У 2026 годзе Паставы – невялікі, але незвычайна ўтульны і значны горад Віцебшчыны – стаў культурнай сталіцай краіны. Паставы маюць багатую гістарычную спадчыну, яркую культуру і актыўную грамадскую супольнасць, якая гатова паказаць усёй Беларусі і свету свае культурныя і творчыя здольнасці.
Гісторыя Пастаў налічвае некалькі стагоддзяў. Першае дакументальнае ўзгадванне датуецца 1409 годам. Да сярэдзіны XVIII ст. Паставы былі невялікім мястэчкам, але ўжо ў тыя часы мясцовасць славілася багатымі кірмашамі, якія працягваліся да двух тыдняў. У 1720-я гады Паставы перайшлі ў валоданне роду Тызенгаўзаў. Менавіта ў XVIII ст. у горадзе быў пабудаваны ўнікальны архітэктурны ансамбль рынкавай плошчы, палац, а таксама арганізавана мануфактурная вытворчасць, што стала важным крокам у развіцці Пастаў.
Але гэта не толькі гісторыя, якая прайшла праз Паставы, але і гісторыя, якая працягваецца. На сённяшні дзень горад імкнецца да змен, і статус культурнай сталіцы стане трамплінам для яго далейшага развіцця.
Традыцыйную культуру Пастаўшчыны прадстаўляюць шматлікія выдатныя творчыя калектывы. Сярод іх – заслужаны аматарскі калектыў Рэспублікі Беларусь фальклорны ансамбль «Паазер’е», ансамблі народнай музыкі і песні «Заранка», народнай песні «Вітанне», беларускай песні «Маладзіца», аўтэнтычнай песні Андронаўскага сельскага клуба, хор ветэранаў і хор настаўнікаў, духавы аркестр, эстрадны калектыў «25 плюс-мінус», вакальна-інструментальны ансамбль «Скіфы».
Вялікая ўвага надаецца развіццю творчага патэнцыялу дзяцей. Далёка за межамі раёна вядомы цыркавая студыя «Каскад», лялькавы тэатр «Вытворяшки», аркестр баянаў Art-tonika, унікальны і адметны ансамбль «Старадворскія лыжкары».
Не менш важнай часткай падрыхтоўкі горада да статусу культурнай сталіцы з’яўляецца прасоўванне сучаснага мастацтва. Паставы імкнуцца стварыць унікальнае культурнае асяроддзе, дзе сучасныя мастакі, музыкі, артысты змогуць рэалізаваць свае ідэі і праявіць свае таленты.
Заснаванне новых культурных цэнтраў, выстаўка сучаснага мастацтва, праекты для моладзі – усё гэта не толькі дадае новыя магчымасці для мясцовых жыхароў, але і прыцягвае ўвагу тых, хто цікавіцца сучаснымі тэндэнцыямі ў культуры. Спецыяльныя фестывалі і канцэрты, на якіх будуць прадстаўлены сучасныя беларускія і замежныя выканаўцы, дапамогуць Паставам стаць важным цэнтрам культурнага жыцця на карце Беларусі.
Напрыклад, традыцыйны Міжнародны фестываль народнай музыкі і песні «Звіняць цымбалы і гармонік» у Паставах збірае ўдзельнікаў і гасцей з розных краін свету больш за трыццаць гадоў. На ім папулярызуюцца беларускія традыцыі і таксама адбываецца знаёмства з культурнай спадчынай іншых народаў.
Асаблівай увагі заслугоўвае і інтэрактыўная маршрутная карта Пастаў, якая мае вялікае значэнне для турызму і развіцця культурнага сектара. На ёй можна знайсці ўсе значныя гістарычныя аб’екты горада: ад самых старажытных цэркваў і касцёлаў да палацаў і сядзіб, якія з’яўляюцца выдатнымі прыкладамі беларускай архітэктуры. Карта дазваляе карыстальнікам атрымліваць падрабязную інфармацыю пра кожны аб’ект, яго гісторыю, а таксама ўбачыць фотаздымкі, каб лепш уявіць гэтыя помнікі культуры.
Статус культурнай сталіцы Беларусі 2026 года для Пастаў стане магчымасцю прадэманстраваць сваю гістарычную спадчыну і здольнасць развіваць сучасную культуру. Адбудзецца гэта дзякуючы мясцовым уладам, грамадскім арганізацыям і самім пастаўчанам, якія ўжо рыхтуюцца да дадзенага статусу з вялікім энтузіязмам і любоўю да роднага горада.
Падрыхтавана па матэрыялах адкрытых інтэрнэт-крыніц
