Педагогі Дашкольнага цэнтра развіцця дзіцяці г. Калінкавічы выкарыстоўваюць розныя метады навучання, якія аб'ядноўвае агульная мэта: усе яны садзейнічаюць гарманічнаму развіццю выхаванцаў.
Адным з самых яскравых і цікавых праектаў гэтага года стала работа мультстудыі. Тут дзеці самі ствараюць мультфільмы пра гісторыю нашай краіны. У працэсе работы дашкольнікі раскрываюць свой творчы патэнцыял, вучацца дапамагаць адзін аднаму, працаваць у камандзе.
У рамках праекта дашкаляты зляпілі пластылінавых герояў Марыйку і Міколку. Па сюжэце дапытлівая дзяўчынка распытвае брата аб тым, куды зніклі маманты. А той прапануе знайсці адказы на пытанні, адправіўшыся ў падарожжа ў аграгарадок Юравічы, каб пазнаёміцца са стаянкай першабытнага чалавека.
Стварэнне мультфільма дазваляе выхаванцам даведвацца пра факты гісторыі сваёй Радзімы на прыкладзе канкрэтных археалагічных знаходак і помнікаў.
Дзеці агучваюць персанажаў, што развівае іх мову, пачуццё рытму і музычнасць. А ў час здымак вучацца ўзаемадзейнічаць, абменьвацца ідэямі і сумесна прымаць рашэнні.
Педагогі перакананы, што такія праекты не толькі пашыраюць кругагляд выхаванцаў і развіваюць іх творчыя здольнасці, але і дапамагаюць прывіць павагу да гісторыі і культуры свайго народа, што з'яўляецца неад'емнай часткай станаўлення асобы.
Падрыхтавана па матэрыялах сайта РВУ «Выдавецкі дом „Педагагічная прэса“»
ул. Короля, 16, 220004, г. Минск