Штогод 24 мая адзначаецца Дзень славянскай пісьменнасці і культуры. Сотні мільёнаў людзей, што пішуць кірыліцай, успамінаюць братоў Кірылу і Мяфодзія, ураджэнцаў Салуні (сучасныя Салонікі), вялікіх асветнікаў ІХ стагоддзя. Менавіта яны пераклалі на стараславянскую мову Святое пісанне, стварыўшы для гэтага славянскую азбуку.
Большасць літар кірылічнага алфавіта мела грэчаскія прататыпы, выключэннем з’явілася літара Ш, што паходзіла ад яўрэйскай Шын. Царква, як каталіцкая, так і праваслаўная, годна ацаніла заслугі братоў: абодва былі кананізаваны як асветнікі славян (slavorum apostoli). Цікава, што ў царкоўным абіходзе спачатку згадваецца Мяфодзій, які меў высокі царкоўны сан, а пасля кніжнік Кірыл. У 1863 годзе Свяшчэнны Сінод у гонар тысячагоддзя з’яўлення першай рукапіснай славянскай Бібліі аб’явіў днём Кірыла і Мяфодзія 11 мая, па новым стылі – 24 мая. Гэта і царкоўнае, і свецкае свята, якое радуе ўсіх тых, хто цэніць друкаванае слова і родную мову.
Сучасныя сістэмы пісьма беларусаў, украінцаў, расіян, балгар, македонцаў, сербаў, а таксама алфавіты шматлікіх неславянскіх народаў (адыгейскі, калмыцкі, кіргізскі, мангольскі, татарскі, удмурцкі і інш.) выкарыстоўваюць кірылічныя літары. Некаторыя краіны адмаўляюцца ад выкарыстання кірыліцы на карысць лацінкі. Гэта два ўніверсальныя алфавіты, якія маюць падобныя структуру і сімвалы. У кожным з іх ёсць свае функцыянальныя перавагі і недахопы. Тым не менш, кірыліца – значна багацейшая і зручнейшая азбука, бо здольная перадаць большы спектр гукаў.
Пазнаёміцца з гісторыяй узнікнення і развіцця пісьменнасці, кнігадрукавання і пісьменніцкай дзейнасці ў Беларусі, убачыць старадаўнія рукапісы, старадрукі і рэдкія кнігі, якія сталі сусветнай спадчынай, можна ў Музеі кнігі ў Нацыянальнай бібліятэцы Беларусі і Полацкім музеі беларускага кнігадрукавання.
24 мая 2026 года ў Мінску з нагоды Дня славянскай пісьменнасці і культуры пройдзе хрэсны ход. Шэсце пачнецца ад Свята-Духава кафедральнага сабора і завершыцца на Мінскім замчышчы.
25–26 мая 2026 года ў сталіцы адбудуцца XXXII Міжнародныя Кірыла-Мяфодзіеўскія чытанні на тэму «Жанчына ў гісторыі славянскай пісьменнасці і культуры».
У канферэнцыі прымуць удзел прадстаўнікі навуковай і культурнай грамадскасці, кіраўнікі адукацыйных устаноў, выкладчыкі, аспіранты і студэнты дзяржаўных і царкоўных устаноў адукацыі, а таксама прадстаўнікі духавенства.
Тэматычныя напрамкі работы мерапрыемства ахопліваюць шырокае кола пытанняў: спадчына прападобнай Еўфрасінні Полацкай у сучасным свеце; асоба святой праведнай Сафіі, княгіні Слуцкай, у кантэксце эпохі; малітоўны подзвіг блажэннай Валянціны Мінскай; жаночае манаства ў гісторыі Праваслаўнай Царквы; роля жаночага служэння ў гісторыі праваслаўнай царквы на Беларусі; жанчыны ў гісторыі станаўлення беларускай дзяржаўнасці; актуальныя пытанні царкоўнай гісторыі і рэлігіязнаўства, біблеістыкі, багаслоўя і навукі.
Штогадовыя Кірыла-Мяфодзіеўскія чытанні з’яўляюцца форумам, які ўжо больш за 30 гадоў аб’ядноўвае спецыялістаў і вучоных з краін блізкага і далёкага замежжа, якія працуюць у галіне багаслоўя, гісторыі, філасофіі, культуралогіі і рэлігіязнаўства.
