Кніга «Сімвалы суверэннай Беларусі», выдадзеная выдавецтвам «Беларусь» пры падтрымцы Міністэрства інфармацыі, з’яўляецца эксклюзіўным праектам ЦВК Беларусі. Аўтар і складальнік кнігі – Сяргей Мусіенка. У падрыхтоўцы выдання таксама ўзялі ўдзел Ігар Марзалюк, Фёдар Повны, Міхаіл Баразна ды іншыя знакамітыя людзі краіны.
Экзэмпляр кнігі «Сімвалы суверэннай Беларусі» падораць грамадзянам Беларусі, якія будуць упершыню аддаваць свой голас на выбарах Прэзідэнта Рэспублікі Беларусь, якія адбудуцца ў краіне 26 студзеня 2025 г.
У змесце кнігі прадстаўлены 23 сімвалы сучаснай суверэннай Беларусі. Кожны сімвал прайшоў праверку часам або мае непасрэдныя адносіны да сучасных рэалій рэспублікі. Так, на старонках новага выдання чытачы знойдуць і Палац Незалежнасці разам з плошчай Дзяржаўнага сцяга, і Беларускі дзяржаўны музей гісторыі Вялікай Айчыннай вайны, і парк Перамогі разам са стэлай «Мінск – горад-герой». Таксама адлюстраваны сімвалы, якія мы атрымалі ў спадчыну ад продкаў, у савецкі час, – Хатынь, Курган Славы.
У мастацкім афармленні выдання «Сімвалы суверэннай Беларусі» прыняла ўдзел вялікая творчая група студэнтаў Беларускай дзяржаўнай акадэміі мастацтваў ды іншыя маладыя мастакі.
Акрамя змястоўных артыкулаў, у кнізе чытачы знойдуць QR-коды, з дапамогай якіх змогуць здзейсніць віртуальнае падарожжа ў Белавежскую пушчу, убачыць, як расце лён на беларускіх палях, як вырабляецца адзін з нашых нацыянальных здабыткаў – слуцкі пояс, наведаць храм-помнік у гонар Усіх Святых у Мінску.
Вядома, што кніга стане не проста арыгінальным падарункам, але і ўнікальным гісторыка-асветніцкім помнікам кніжнага выдання сучаснай Беларусі.
Падрыхтавана па матэрыялах БЕЛТА;
фота для прэўю: сайт ЦВК Беларусі
ул. Короля, 16, 220004, г. Минск