5 мая 2026 года ў Беларусі стартавала рэспубліканская акцыя «Ганаруся роднымі сімваламі», арганізатарам якой выступіў БРСМ. Мерапрыемства прымеркавана да Дня Дзяржаўнага герба, Дзяржаўнага сцяга і Дзяржаўнага гімна. Сёлета свята адзначаецца 10 мая.
Патрыятычны марафон накіраваны на папулярызацыю галоўных дзяржаўных сімвалаў Беларусі, фарміраванне ў моладзі любові да Радзімы, павагі да яе гісторыі, беражлівых адносін да дзяржаўнай сімволікі, прыцягненне ўвагі грамадзян да іх ролі ў фарміраванні нацыянальнай самасвядомасці і гонару.
Традыцыйна ў дні правядзення акцыі адбудуцца ўрачыстыя цырымоніі ўручэння маладзёжных білетаў, будуць арганізаваны масавыя флэшмобы пад назвай «Жывы сцяг», патрыятычныя прабегі (пешыя, аўта, мота, вела) праз значныя гістарычныя, культурныя і сучасныя аб’екты, мітынгі, ускладанні кветак. Акрамя таго, запланаваны гісторыка-асветніцкія сустрэчы з моладдзю ў жывым і анлайн-фарматах.
Важнай часткай акцыі стануць анлайн-блокі. Напрыклад, праект «Пад сцягам краіны» накіраваны на ўспрыняцце дзяржаўных сімвалаў не як фармальных атрыбутаў, а як часткі асабістай гісторыі, дасягненняў і жыццёвага шляху чалавека. Кожны ўдзельнік зможа выказаць сваю прыналежнасць да краіны, расказаць пра асабістыя дасягненні, значныя падзеі, прафесійны шлях, уклад у развіццё краіны.
Кожны жадаючы таксама можа паўдзельнічаць у фотаакцыі «Сцяг пераможны – радасці сцяг» – зрабіць сямейныя фатаграфіі са сцягам каля розных знакавых аб’ектаў. Матэрыялы трэба апублікаваць ў сацыяльных сетках і адзначыць афіцыйныя акаўнты БРСМ.
Па словах першага сакратара ЦК БРСМ Уладзіміра Паўлоўскага, «дзяржаўныя сімвалы выступаюць найважнейшым элементам нацыянальнай ідэнтычнасці, паказчыкам незалежнасці і ўстойлівасці дзяржавы. Павага да іх з’яўляецца асновай грамадзянскага выхавання, фарміравання адказнага грамадства і падрыхтоўкі новых пакаленняў дастойных грамадзян і патрыётаў сваёй краіны».
Падрыхтавана паводле БЕЛТА
16, Korolya Street, Minsk, 220004