Да 105-годдзя з дня нараджэння Міколы Аўрамчыка

Мікола Якаўлевіч Аўрамчык – беларускі паэт, пісьменнік, перакладчык. Сёлета, 14 студзеня, адзначаецца 105-годдзе з дня нараджэння выбітнага мастака слова.

Любоў да літаратуры будучаму пісьменніку прывіла настаўніца Алена Лаўрэнаўна Меляшкевіч, дзякуючы якой Мікола Аўрамчык горача палюбіў апавяданні і аповесці Якуба Коласа і Кузьмы Чорнага, вершы Янкі Купалы і Максіма Багдановіча.

У 1938 г. М. Аўрамчык паступіў на філалагічны факультэт Мінскага педагагічнага інстытута, адначасова працаваў у рэдакцыі газеты «Піянер Беларусі». Падчас Вялікай Айчыннай вайны ўдзельнічаў у баях на Паўночна-Заходнім і Волхаўскім франтах. Пасля вайны працаваў на аднаўленні Данбаса.

Пазней у пасляваенныя гады працаваў у рэдакцыях газет «Чырвоная змена», «Літаратура і мастацтва», у часопісе «Полымя». Быў членам Саюза пісьменнікаў СССР (з 1947 г.). У 1953–1980 гг. з’яўляўся рэдактарам аддзелу паэзіі часопіса «Маладосць».  

У вершах М. Аўрамчыка адлюстраваны драматычны ваенны лёс паэта, жыццё ў фашысцкай няволі, шахцёрская праца, вучоба ва ўніверсітэце, уражанні ад паездак па краіне. Міколу Якаўлевіча можна сапраўды назваць майстрам сюжэтна-арганізаванага верша, канкрэтнай паэтычнай дэталі, лірычнага эцюда, замалёўкі. Паспрабаваў Мікола Аўрамчык свае сілы і ў прозе, напісаўшы раман «У падзямеллі» і аповесць «Палон», праўдзіва расказаўшы пра зведанае ў гады Другой сусветнай вайны. У кнізе «Знаёмыя постаці» змешчаны аповеды пра пісьменнікаў, з якімі ў той ці іншы час звёў лёс.

Пераклаў на беларускую мову паасобныя творы Дж. Байрана, А. Міцкевіча, Л. Украінкі, І. Франко, М. Джаліля, Г. Эміна, І. Куратава, С. Ясеніна, Я. Смялякова, зборнікі вершаў С. Міхалкова «А што ў вас?», паэму М. Нагнібеды «Васілёк» (1961) і інш.

Лёс Міколы Аўрамчыка быў пакручастым, неаднойчы набліжаў яго на валасок да смерці. Але паэт жыў не толькі за сябе, але і за сяброў, якія сышлі рана. Апошнія гады свайго жыцця пісьменнік цяжка хварэў. Памёр Мікола Аўрамчык 8 мая 2017 года. Пахаваны на Паўночных могілках Мінска.

Падрыхтавана па матэрыялах адкрытых інтэрнэт-крыніц