12 лістапада 2025 года спаўняецца 105 гадоў з дня нараджэння народнага пісьменніка Беларусі, лаўрэата Літаратурнай прэміі імя Янкі Купалы і Дзяржаўнай прэміі БССР імя Якуба Коласа, драматурга Андрэя Ягоравіча Макаёнка.
Нарадзіўся ён у 1920 годзе ў вёсцы Борхаў на Гомельшчыне. З маленства захапляўся кнігай, мастацкай самадзейнасцю, маляваў, ляпіў з гліны. Падчас Вялікай Айчыннай вайны прайшоў з баямі Крым, быў паранены пад Феадосіяй, пасля чаго працаваў настаўнікам у Грузіі, а пазней вярнуўся на радзіму.
Пасля вайны Макаёнак працаваў у камсамоле і партыйных органах, але ўсё больш цягнуўся да літаратуры. У 1940-я гады напісаў сваю першую аднаактоўку «Добра, што добра канчаецца», адзначаную на рэспубліканскім конкурсе. У 1951 годзе ў Купалаўскім тэатры паставілі яго драму «На досвітку», якая прынесла аўтару поспех. Сусветную вядомасць пісьменніку дала камедыя «Выбачайце, калі ласка!» (1953), пастаўленая сотнямі тэатраў СССР.
Найвышэйшага майстэрства драматург дасягнуў у канцы 1960–1970-х гадоў, стварыўшы трагікамедыі «Зацюканы апостал», «Трыбунал», сатыры «Таблетку пад язык», «Святая прастата», «Верачка», «Пагарэльцы», «Дыхайце эканомна». За п’есы «Трыбунал» і «Таблетку пад язык» ён атрымаў Дзяржаўную прэмію імя Якуба Коласа, а ў 1977 годзе стаў народным пісьменнікам БССР.
Андрэй Макаёнак памёр 16 лістапада 1982 года, застаючыся адным з самых вядомых беларускіх драматургаў ХХ стагоддзя, творчасць якога адрозніваецца глыбокім гуманізмам, трагікамічнай мудрасцю і непаўторным нацыянальным каларытам.
16, Korolya Street, Minsk, 220004