Друкаваць
Катэгорыя: Праздники и знаменательные даты

Штогод 2 красавіка, у дзень нараджэння вялікага казачніка Ганса Хрысціяна Андэрсэна, ва ўсім свеце адзначаецца Міжнародны дзень дзіцячай кнігі. Свята было ўстаноўлена па ініцыятыве Міжнароднага савета па дзіцячай кнізе (International Board on Books for Young People, IBBY) у 1967 годзе.

Раз на два гады прысуджаецца прэмія імя Г. Х. Андэрсэна пісьменніку і мастаку-ілюстратару, чые творы ўнеслі значны ўклад у развіццё дзіцячай літаратуры. Гэта Нобелеўская прэмія ў галіне дзіцячай літаратуры ў 2018 годзе была ўручана японскай пісьменніцы Эйко Кадона (вядомы цыкл яе кніг «Служба дастаўкі Кікі» («Ведзьміна служба дастаўкі»)) і расійскаму ілюстратару Ігару Алейнікаву (напрыклад, кніга «Mahalia Mouse goes to College» J. Lithgow выдавецтва Simon&Schuster з яго ілюстрацыямі стала бестселерам у ЗША ў 2007 годзе).

Прапанова святкавання Міжнароднага дня дзіцячай кнігі належыць нямецкай пісьменніцы Еле Лепман, якая калісьці сказала: «Дайце нашым дзецям кнігі, і вы дасцё ім крылы». Штогод вызначаецца тэма свята, запрашаецца вядомы пісьменнік і ілюстратар з краіны-спонсара для стварэння паслання да дзяцей і плаката. Гэтыя матэрыялы выкарыстоўваюцца для папулярызацыі кніг і абуджэння цікавасці да чытання па ўсім свеце.

У 2019 годзе спонсарам святкавання Міжнароднага дня дзіцячай кнігі стала Літва. Тэма сёлетняга свята незвычайная – «Кнігі дапамагаюць нам запаволіцца». Аўтарам паслання і дызайна плаката стаў Кястуціс Каспаравічус. У сваім пасланні ён адзначыў: «Я ў спешцы! ... У мяне няма часу! ... Бывайце! ... Мы чуем такія словы амаль кожны дзень не толькі ў Літве, якая знаходзіцца ў самым цэнтры Еўропы, але і амаль па ўсім свеце. Не менш часта мы чуем, што мы жывём у час інфармацыйнай перагрузкі, паспешлівасці і мітусні.

Але калі ўзяць кнігу ў рукі, вы адразу адчуеце змену. Здаецца, што кнігі маюць гэту выдатную якасць – яны дапамагаюць нам запаволіцца.

<…> Я ўпэўнены, што кнігі ніколі не сумуюць, калі яны ў вашых руках. Той, хто любіць чытаць – няхай гэта будзе дзіця або дарослы – значна цікавейшы за таго, хто не клапоціцца пра кнігі, хто заўсёды траціць час, хто ніколі не паспявае сесці, хто не заўважае многае з таго, што вакол».

Беларусь надае шмат увагі развіццю дзіцячай літаратуры. Пацвярджэннем таму з’яўляюцца рознага роду прэміі: Нацыянальная літаратурная прэмія (намінацыя «Дзіцячая літаратура»), Прэмія Цёткі і інш.

Беларуская дзіцячая літаратура ў канцы ХХ – пачатку ХХІ ст. імкнецца да асэнсавання новай рэчаіснасці, новай сістэмы маральна-этычных каштоўнасцей, шукае новыя шляхі абуджэння цікавасці да яе з боку чытачоў. Спалучэнне новых тэм і форм іх прэзентацыі, увага да ўласных літаратурных традыцый забяспечваюць стварэнне цікавых узораў сучаснага слоўнага мастацтва для дзяцей.

 

НІА